D'Niagarafäll (en.: Niagara Falls [naɪˌæɡ(ə)ɹəˈfɔːlz]) si Waasserfäll vum Niagara River op der Grenz tëschent dem US-amerikanesche Bundesstaat New York an der kanadescher Provënz Ontario.
Niagara Falls heeschen och déi zwou Stied Niagara Falls am Bundesstaat New York an Niagara Falls am Ontario, op den zwou Säite vum Floss.
Den Niagara River verbënnt den Erieséi mam Ontarioséi. Bei den Niagarafäll fält e 57 Meter an d'Déift. D'Inselen Luna Island a Goat Island deelen d'Waasserfäll an dräi: D'American Falls an d' Bridal Veil Falls op der amerikanescher Säit, an d'Horseshoe Falls ("Houfeisefäll"), duerch deen d'Grenz tëscht den USA a Kanada geet. D'American Falls hunn e Bord vun 260 m, d'Horseshoe Falls vun 670 m, an d'American Falls tëscht 21 a 34 m.
Fir d'Schëfffaart gouf den 43 km laange Wellandkanal ugeluecht, fir mat Schleisen den Niveausënnerscheed z'iwwerwannen.
An der Moyenne huet den Niagara-River en Debit vu 5750 m³/s, wouvunner dagsiwwer op d'mannst 2832 m³/s (tëscht engem Véierel an der Hallschent) d'Waasserfäll erofginn. Nuets ass den Debit vun de Fäll 1416 m³/s. Dat läit dodrun, dass en Deel vum Waasser iwwer e Staudamm ëmgeleet gëtt, fir Stroum ze gewannen.
Mat iwwer 18 Millioune Visiteuren am Joer sinn d'Niagarafäll eng vu de populäersten Touristenattraktiounen an Nordamerika.