D'Sydney Opera House ass ee vun den am meeschte markanten a berüümte Gebaier vum 20. Joerhonnert an d'Emblem vun der australescher Stad Sydney. Et gouf vum däneschen Architekt Jørn Utzon (1918–2008) entworf.
2005 gouf et an d' Australian National Heritage List, an den 28. Juni 2007 op d'Lëscht vun der UNESCO-Weltierfschaft agedroen.
De Bau, dee vun 1959 bis 1973 gedauert huet, huet e puer Joer méi laang gedauert a 14,3 Mol méi kascht wéi ufanks geplagt.
D'Gebai ass 184 Meter laang, 118 Meter breet a bedeckt eng Surface vu ronn 1,8 Hektar. Säin onverwiesselbaren Daach ass 67 Meter héich a mat 1.100.000 glaséierten, wäissen, blénkege Keramikplättercher aus Schweden verkleet. Et steet op 580 Péil, déi 25 Meter déif am Buedem verankert goufen, a weit eng 160.000 Tonnen.
Et steet um Bennelong Point, eng Hallefinsel am Hafen op där anerer Säit vun der 1932 gebauter Sydney Harbour Bridge.
Bannen am Operenhaus si fënnef Theatere mat am ganze 5.541 Sëtzplazen: D' Concert Hall mat 2.688 Sëtzer, den Joan Sutherland Theatre, fir Operen, mat 1.547 Sëtzer, d' Drama Theatre mat 544 Sëtzer, d' Playhouse mat 398 an de Studio Theatre mat 364 Sëtzer. Ënnert den am ganze ronn 100 Raim si fënnef Proufstudioen, e Kino, 60 Garderoben, véier Restauranten, sechs Baren an e puer Souvenirsbutteker.